الكسكروت اللبلابي… 66 سنة تاريخ

0 335

لقينالك اصول الكسكروت اللبلابي وتاريخو الكبير. حبينا نشاركوكم اليوم المعلومات هاذي بش تعرفو اللي ورا أكا الكسكروت البنين تاريخ عظيم.

“العم قدور”

كل شيء بدا في الخمسينيات وقت اللي عمّك “قدور” جاتو الفكرة بش يطّيّب الحمص بالبخّار. وقتها كان ينصب بحذا المكتب الفرنساوي التونسي. ينصب عمّك “قدور” ويحط بين ساقيه سطل حديد معبّي بالحمص المفوّر البنين. باش يحافظ على السخانة متاع اللبلابي، كان عم “قدور” يحط فوق السطل شكارة مصنوعة من الحلفة. يبيع الحمص في قرطاس مصنوع من الورق. بعد ما يعبيه بالحمص يعمل فوقو رشّة ملح صغيرة باش يزيدو بنة على بنة. الماكلة هاذي كانت من أعز المأكولات في الوقت اذاكا. أما يا حسرة، البنة هاكي الكل كانت تتباع ب5 فرنكات أكاهاو. صحّة وبالشفاء ليهم.

مختار

في الستينيات من القرن اللي فات، واحد اسمو “مختار” ويعيطولو زادة “مختار أبنّ” جاتو الفكرة بش يولي يبيع الكسكروتات بالحمص المفور اللبلابي. كسكروت معبي بالحمص المفور وفوقو رشة صغيرة ملح. الخبز السخون والحمص الذوّاب وريحتهم اللي تفوح في الحوم العربي عملوا حالة في العباد. عمك “مختار” كان ديما ينصب بالكروصة متاعو قدام باب الجديد. الناس الكل كانو يعرفوه وقتها بالجملة الشهيرة متاعو “أبّن من البانان”. ومن هنا جات تسمية “مختار أبّن”. عمك “مختار” كوّن روحو بروحو من اللبلابي. شرا عمارة كاملة من بيعان الكسكروتات و عمل حجّة. جات النية قصيرة وتوفى في مكّة. بعد ما مات عم “مختار” الله يرحمو وينعمو شد ولدو الكبير بلاصتو.

اللخرين في اواخر السبعينات، كثروا بياعة كسكروتات اللبلابي . من بين البياعة المشهورين في كالوقت ثمة بونهوف وزرقة. بونهوف بعد ما لمّ شوية فلوس حل حانوت صغير في نهج الجزارين. المعلم المعلم متاع اللبلابي ما ينجم يكون كان محمد الهادي. عمّك محمد الهادي ينصب ديما شيرة السبيطار القديم. الكسكروت متاعو بنين ومشخشخ. ساعات تراصلك تشّد الصف بالربع ساعة باش تجّم تشري وتتبنن الكسكروت متاع سي محمد الهادي. من بيعان اللبلابي، ملك محمد الهادي الديار والكراهب المفخمة. هو اليوم عندو كرهبة bmw لكنو مازال متواضع و يسربي في كليوناتو والضحكة ماتفارقش عويناتو

تعليقات
Loading...