Now Reading
رد بالك تحط ساقيك في سوسة …

رد بالك تحط ساقيك في سوسة …

في البلاد الي شعبها classé 98 في السعادة بين شعوب كوكب الأرض ( في إنتظار إكتشاف ترتيب شعوب المريخ و زحل إلي نتصور نفوتوهم بالصبر )، و إلي السعادة فيها راعيها الرسمي هو الناموس ، الأومبوتياج ، غل كونتر العروفات في الخدمة و الزميل الصالح الي ما يراتيكش في الصبه، و إلا فاتورات الماء و الضو و الزبلة و الخروبة إلي شطر الشعب موش مخلصها و مبعد يشكي مالوسخ ، في بلاد باش يضحكوك يحطولك العربي المازني يتكومك كل سبت …تلقى روحك مادد إيديك للمولى عشية جمعة في نهار فضيل تدعي للروحك بهجة من هالوطن الغالي؛ فبحيث أيها القارئ لهته الأسطر ، كان خممت تهج مالواقع الكاكاوي إلي تعيش فيه ، إدعي للروحك بهجة شنڤان ، هجة لكوبا ، هجة لأستراليا بحذا الكنغر و الا لبلاد الشيز بيرغر ، هج حتى لموطن البطريق الأصلي اما رد بالك تخمم تشد الأوتوروت و تهبط لسوسة ، رد بالك تحط ساقيك في سوسة

شعندك تعمل في سوسة !!! ما تقليش تعمل جو كي تشق شارع اللاس فيغاس (و الي علقولو بلاكة 14جانفي بعد الثورة و الأهالي فسخوها مؤخرا) … رد بالك كان شقيت الللاس فيغاس و ريت التيراسات متاع القهاوي معبية بالشباب و الشابات اليافعات المليئات بالزين العربي المخضرم باللبسة المقتبسة عن السائحات الزائرات للجوهرة باش تلقى روحك قدام جنس نادر من الحوريات (قلو داعش واعدتهم بحور العين ، مالا بنات سوسة هاكم شكون !!!) في هذا الإطار الباراديزي ، شمهبطك لسوسة

و كان غلطت (و النفس خطائة ) و طمعت إنك تعمل بتي داج بحذا جو الشباب السوسي المريخي الطبع ، رد بالك تهبط بتي داج … شنيه [ كاس jus + قهوة + كرواسون + سالامي + عظمة + عسل + شكلاطة + زبدة + تارتين + اوملات + دبوسة ماء صغيرة] ب dt 4 ما هذا !!! خليك في ال716 في اللاك2 ، شمهبطك لسوسة !!! و كانك مزروب رد بالك تعملو البتي داج ، خاطرك بطبيعتك تعملو في نص ساعة و الا ساعة كان الشلة كبيرة ، فك عليك من بتي داج سوسة ..

port-elkantaoui_sousse-tunisie

. لأنك من غير ما تشعر باش تلقى ووحك ماددهم في التيراس و سارح و الشمس تدغدغلك في شوافرك و تبنن بيك ونتي “ڤاعد” الساعة لولا ، الساعة الثانية، الساعة الثالث …. و ما تسألش روحك فاش تخمم ، خاطرك باش تلقى روحك ساكت ما تخمم في شي ، و حاسس بروحك تقول بوذا كل ما تقعد كل ما تزيد تعلى عالقاعة و الا تقول واحد من تماسح جربة إكسبلور مع الساعتين متاع القايلة كي يخرجو مالماء و يحلو افامهم للشمس و يقعدو فيكس بالساعتين ما يتحركوش … هاكه علاش قارئ أو قارئة هاته الأسطر ؛ فك عليك ، رد بالك تحط ساقيك في سوسة

باهي و كملتو هالبتي داج المحنون ، شمزال عندك ما تعمل … زايد سوسة قلق صبه … وين باش تمشي ، و بره عاده تاكسيات و مصروف … رد بالك تكمل تسرح بساقيك و تمشي مثلا مثلا للjobi و الا الstadium و الا NOA و الا و الا و الا … زيد قايلة شكون باش تلقى … رد بالك تمشي خاطر بطبيعتهم البلايص هاكم يزحمو مالاربعة و البنات فيهم أكثر مالأولاد و زيد الأولاد لغادي ياسر cool باش تلقى روحك (مكشخ و الا clubiste و الا حتى محب من جريدة توزر المستقبل) و من غير ما تشعر تحكي مع الطاولة الي في جنبك و لولاد باعثينلك كاس offre و البنات يسلمو عليك تقول تعرفهم عندك برشة ، و امشي عاده قول الي لولاد كذا و الشي و البنات تيت ، خاطر كانك تخمم هكاكه راك مريض و مكبوت و مخك يبعد عالمرزوقي زوز صانتي، هاكه علاش؛ فك عليك ، ما تحطش ساقيك في سوسة … إيه حقه ما تتصدمش كي تعمل أربعة كعبات و شوتور و بيتزا و تجيك الفاتوره 28dt رد بالك تقول راني عڤبتها عالسرفور ، خاطر القعدة في سوسة تتفكتر بالدينار الرمزي … ونتي ماكش متاع الشي هذا … انتي متاع الدبابس و الفاتورة المضروبة و الا الزايدة ، فك عليك من فاتورة سوسة ، رد بالك تحط فيها ساقيك … و حتى كان حبيت تكمل سهريتك زايد ، وين باش تكملها ، تخرج تلقاها خالية و قفار مالثمنية ، جوست les parkings زحمة … ماو بكلها زحمة وسط les club صايي … وراك ال mils و قدامك الفانيلا و الliving و الباناناس و على يسارك الصالون و قدامهم شوية الlegends و الbaron و الdolcevita و الmovenpick و .. و .. و حتى كان باش تسرح لقدام شوية شباش تلقى الQG و الا بامبوشكه ، بره عاده كان تكبطت و خذيت تاكسي ب 700مليم و لقيت روحك في القنطاوي ، و توصل للڤولف و الا للiron و les live band يلعبو !!! ملا “ڤلڤ” !!! تي هوما الأمريكان و عڤبوها عليهم السواسة ، رصاتلهم حالين الhard rock cafe الوحيدة في الجمهورية في سوسة !!! شملزك هابط لسوسة تعشي و تسهر و تتعشى بستين ألف !!! فك عليك أخطاك ، اش محطك في ساقيك في سوسة !!!

و زيد كان كملت شخت و سمعت الموزيكا و عرقت بالشطيح ، تمشيشي تجوع ، خاطر آسف ، خدمة الفاست فود غير مبرمجة بالشبكة السوسية ، لا فمه شاباتي في المنشية ، لا فمه كسكروت مهبول عند la cabane في شارع النخيل … ما فمه شي … و رد بالك تحصل و تعمل كسكروت شناب بخبزو الي يتڤرمش و تسطيرتو الخفيفة و عظمتو الي قصانها و سط الكسكروت تحبلو قراية عامين بعد الباك باش تفهم كيفاش ، و التن … التن … و كعبات الفاريانت وسط الصحن و دايرين بيهم كعبات الزيتون الساحلي ….. (دموع كاتب هته الكلمات تذرف لحظة كتابة الأسطر الأخيرة )

ايه … و سهرت و شبعت و روحت تتفرج عالدنيا 16/9 و تبسيمتك على خدك و بايت متهني و مقومتك الصباح ريحة البحر و صوت الموجة و الشمس تدغدغلك في حواجبك الصباح ونتي تحل عينيك و تقعد تغزر للسقف ساعة، لاك فاهم روحك فرحان لا ما تحبش تروح ، و تخمم في صاحبك في سبيطار الرابطة تكلمو على سرتيفيكا تبعثها للخدمة باش تزيد نهارين … و الا لواه زايدين النهارين، وين عندك تمشي … باش تمشي لهرڤلة تاقف في هضبة سيدي سعيد بالديار المدهونة بالابيض و الازرق (المثال المصغر لسيدي بوسعيد ) و الا تمشي لفريڤيا بارك في النفيضة تشوف الزارافات و الصيوده سارحين تقولش عليك في قلب الافريك و الا تقدم لقدام لتكرونة و مالجبل تشوف سوسة و مستير و الحمامات تقولش عليك حنبعل في أياماتو ، و الا تمشي لسيدي بوعلي تشوف النعام يجري و تعمل طريح مشوي علوش سارح في السواني و ريحة الزعتر و الاكليل طالعة مالمشوى … و الا تمشي لبلعوم من ريف القلعة الكبيرة انتي و الشلة و تعملو بيكنيك بين الزيتونات … تو متاع هذا انتي !!! أخطاك … ما تحطش ساقيك في سوسة فك عليك … زيد سوسة بعيدة … ساعتين غير ربع بالكرهبة … و هالأيامات الشمس عاملة إعتصام في السماء ، معناها باش ترصيلك لابس نص يد !!! حاصيلو ملخر و من غير  ما نطوّل ؛ موش فخره … أما سوسة دنيا أخرى … فبحيث ، رد بالك تحط ساقيك في سوسة

حسام حمد

Facebook Comments


All Rights Reserved © 2020 Wepost Magazine. Made with Love By WEBIWEBI STUDIO.

Scroll To Top